好似好耐都冇煲過湯咁
以前一星期都會有一至兩次
依家就一星期都唔煲一次
天氣凍個人都特別懶係真 >"<
返到屋企成尊佛咁 郁都唔願郁
見到面書個個都上載 D 湯同糖水相
先搞到我手癢癢都要搵 D 野搞吓
一時之間 諗到有幾個湯都想煲
節瓜章魚湯、木瓜雪耳湯同花膠響螺頭湯…
之前發左 D 花膠一份份包好左放喺冰箱
如果想收工即晚煲會趕唔切解凍 D 花膠同浸螺頭
仲要去買左豬肉先可以返屋企
搞得嚟都好夜吓
諗好煲咩湯 要買 D 咩材料
諗埋個路線圖 就可以順暢好多
快速趕返屋企煲啖靚湯
Yeah... Yummy
見圖就知道我今晚煲左咩湯水潤潤啦
凍冰冰 飲個熱辣辣嘅湯水
雖然係自己煲比自己飲
都覺得暖在心頭喎
(啊Q精神 ~ 自我安慰中XD)
******************************
食譜：- 約四至六人用 (太多除一半啦) ^^"
材料：
木瓜 - 1 個 (約一斤半)
雪耳 - 1 大朵 (我買腍身)
眉豆 - 1 把
花生 - 1 把
紅棗 - 6 粒
南杏 - 少許
雞腳 - 8 隻
瘦肉 - 半斤
我的做法：
1. 用剪刀將雞腳腳指剪短。雞腳同瘦肉略洗，汆水備用。
2. 木瓜去核，切大件。雪耳浸發去蒂，切件。
3. 眉豆、花生、紅棗同南杏略浸洗。紅棗去核。
4. 將所有材料放入三公升的滾水 (雪耳除外)。
5. 轉細火煲一個鐘，加入雪耳再煲多一個鐘， 落鹽調味，再煲多二十分鐘即成。
* 1 把 = 隨手一執 ~ 拿到幾多就幾多
