初三屋企人團拜

~轉貼舊文~

每年初三赤口﹐都係一定去老表屋企團拜﹐幾家人聚首一堂。今年決定唔買禮自己整比人賺不如自己整啦﹐又可以整自己鍾意既野﹐又可以少糖健康 d ^^

呢個『伯爵茶牛油蛋糕』我真係好鍾意﹐食上癮又整上癮…

仲有呢個『朱古力軟曲奇』 ~ 少甜好味

試新機

~轉貼舊文~

買左新機﹐總要試試佢﹐唸左好耐整乜野好﹐翻開一本一本既麵包書﹐又上網左搵右搵﹐最終都係揀左第一次學麵包既食譜… 『核桃提子祼麵包』。

記得第一次學包包時﹐真係覺得好費氣力﹐又搞到成檯成地都係﹐當時唸… 我一定唔會喺屋企做﹐時至今日因為佢既入門﹐希望可以為我及身邊嘅人帶黎多一點既色彩。

記得上次呢個包﹐好多人都話好味﹐連我自己都咁覺得﹐今次唔知道用手搓同用機打會有咩唔同呢？您地睇佢個樣又覺得佢點呀？^_^

攀石 Bonbon 朱古力

《冬天》對我地呢 d 整甜品發燒友﹐一定會唸起做『朱古力 』。

自從上完 Johnny 堂之後都未試過喺屋企練習﹐今個假期帶病上陣﹐結果得一個『差』字﹐而今次用左香檳酒加白朱古力做餡包上70度 Callebaut 黑朱古力﹐剷朱古力底時唔夠平﹐掃色粉時上得唔好﹐沾到轉印紙個底 >.<

令到賣相唔得完美﹐但完全唔影響味道 XD 係賣相唔夠靚啫！繼續努力練習﹐下次希望做得再好 d …

我一直都好怕喺屋企整朱古力﹐因為會整到四圍好污糟﹐而且仲好油好難洗﹐嗚嗚嗚 … … 

我又要走去洗嘢喇 >.< (淚奔)

法式焦糖燉蛋 (Creme Brulee) @ 飯後甜品 (附食譜)

一早出街食完晚飯﹐行返屋企途中總係覺得差咁少少﹐原來係飯後甜品﹐不如整個『Crème brûlée』食好唔好 … 好!!!  返到去就用左一半份量整左三杯﹐整完入雪櫃兩個幾鐘﹐忍唔住要拎佢出嚟食﹐真係好好味啊!! ^^

甜脆茶色玻璃面﹐蛋香﹐布甸滑 ~ Yummy !! 我都覺得好正﹐下次用火槍燒糖面一定要戴手套﹐忍痛被彈左兩下﹐慘! >.<"

******************************

食譜轉貼：- 雪雪兔

法式焦糖燉蛋 (Creme Brulee) 

材料:

牛奶        100ml

砂糖        70g

雞蛋        1隻

蛋黃        4隻

淡忌廉     400ml

雲呢拿     1條

砂糖         適量 (燒焦糖面用)

鮮果         適量

做法:

1. 雲呢拿條先用刀背壓平, 再剖開挖出黑色的雲呢拿子.

2. 將雲呢拿子及雲呢拿條放入牛奶中一起煮滾, 放涼備用.

3. 雞蛋及蛋黃輕輕拌勻, 加入砂糖攪拌均勻.

4. 加入已放涼的牛奶入蛋液中拌勻.

5. 再加入淡忌廉拌勻. (淡忌廉不須打起)

6. 過篩後倒入小焗盤.

7. 放入已預熱150度的焗爐內座水焗30分鐘至蛋漿凝固.

8. 取出放涼後, 可蓋上保鮮紙放入雪櫃冷藏. 

9. 食用時將適量砂糖平均灑在燉蛋上, 用火槍燒至金黃焦糖色.

10. 加上鮮果裝飾, 完成.

假日午餐

~轉貼舊文~

依家有超級廣場真係好好多﹐就係買多買少都可以由自己話事﹐就算買一個橙或者一隻蕉都得﹐慢慢揀又得﹐舒舒服服﹐一次過又可以買埋其他雜貨﹐非常方便…

買完包蠔仔﹐就唸住走去買舊瘦肉﹐瘦肉賣晒﹐得返 d 半肥瘦豬肉我又唔啱 >.< 見到舊豬柳幾靚﹐就肉檔哥哥幫我攪爛埋佢~ 

夜晚浸定米﹐起身就煲咗個『欖菜蠔仔肉碎粥』^o^v