佛手瓜淮山薏仁湯 (附食譜)

早前頻頻同朋友食生日飯﹐冇乜時間留喺屋企煲過湯… 揀左個簡單又理脾健胃嘅去濕湯水。

用紅棗必須要揀雞心棗﹐雖然冇買現成嘅去核紅棗咁方便﹐但煲得湯必須用料靚﹐先至可以發揮其功效﹐所以冇得懶唷。

早前見到有大大粒﹐色澤紅潤又有光澤嘅雞心棗﹐買左四兩(約HK$15)看門口﹐啱啱又用得著 Very Good ^_^

******************************

食譜：- 約六至八人用 (太多就將份量除二啦 ^^" )

材料：

佛手瓜  -  5-6個

生熟薏米  -  各1兩

淮山  -  2兩

雞心棗  -  約20粒

陳皮  -  1片

瘦肉  -  1斤半

我的做法：

1. 瘦肉汆水備用.

2. 佛手瓜洗淨切件備用.

3. 生熟薏米、淮山、雞心棗及沖水洗淨. (雞心棗去核﹐陳皮用刀背去囊)

4. 將所有材料放入六公升的滾水﹐待水滾後用中火滾 15分鐘.

5. 轉細火煲多二個半鐘﹐落鹽調味即成.

參薏袪濕湯 (附食譜)

早前提過﹐屋企個雪櫃壞左﹐為左佢搞左我好耐 (●>_<●)!!!!!!!!!!!!!!!! 點都好﹐依家終於整返好﹐正常返。

真係好耐都冇煲過湯﹐呢個星期又忙到不得了﹐收工都冇時間去街市買餸﹐唯有早 d 起身返工前去附近個街市買餸﹐夜晚返嚟就準備材料煲湯 ヾ(●´▽`●)ﾉ彡☆

呢個湯有清燥熱功效﹐雖然材料睇落好多﹐但睇睇個步驟就知其實好簡單﹐呵呵 ~ 冇難度 ╰(*´︶`*)╯♡ 有時間都試吓啦 (●´∀｀●)

微分享 (。^_・)ノ

我以前都唔識分﹐咩係『生薏米』﹐咩係『熟薏米』？﹗走到藥材店請教專業人仕先知道。

細細粒較重身嘅就係『生薏米』﹐大細似綠豆。大大粒輕飄飄嘅就係『熟薏米』﹐大細似紅豆。
『生薏米』屬性帶寒涼﹐『熟薏米』屬性帶燥熱﹐所以喺煲湯嗰陣兩樣都要落﹐落嘅份量都應該要一樣。而放喺水到﹐『生薏米』會沉底，『熟薏米』會浮面。兩樣都有袪濕功效﹐靚女們要多常飲啊﹐同樣有助去水腫 ^^~

**『薏米』好容易蛀蟲﹐所以最好要幾多買幾多。

我用呢隻『無花果乾』煲湯﹐經中醫師介紹話最靚係呢隻﹐佢嚟自土耳其﹐一盒有 500g 有 32粒﹐索價 HK$55﹐售價比一般無花果乾高﹐亦可當作涼果零食。佢煲緊湯嘅時候會變返漲卜卜﹐浮喺湯面好可愛架 o((*^▽^*))o

『無花果乾』含有豐富鈣質，含鈣量豐富程度甚至比起一份奶製品更高，例如每 4-5 粒無花果，含鈣量就相等於半杯至一杯奶，有 d 人完全唔飲奶 (好似我咁)，或者有人會食加鈣食物、營養丸等，咁不如食無花果乾嚟攝取鈣質。『無花果乾』亦含有豐富水溶性食物纖維﹐可以促進腸胃健康﹐對健康好益處。其他營養素包括鐵同鎂﹐對骨骼有好處﹐亦含花青素﹐有助減低游離基﹐尤其可以保護眼睛健康。

呢隻『淮山片』同一般喺市面上賣嘅唔同﹐係脫左水嘅『淮山片』﹐產自河南﹐不含硫黃成份。一包有一斤 (索價HK$100)﹐包裝背面有合格証﹐有晒生產批號、日期、藥品許可証號同企業地址﹐仲有 GMP 認証號﹐信心保證 ^^" 所以我呢隻沖下水就得﹐唔駛浸半個鐘﹗

市面上為左能夠長期貯藏﹐喺運送前先沾上一層硫黃粉末。所以喺煲湯前最好先浸半個鐘，然後再過幾次水，將硫黃粉去除，否則湯味帶酸 (我以前唔識﹐真係曾經試過煲湯變酸﹐感覺仲好似嘥左煲湯 >_< )，嚴重嘅仲會引起胃部唔舒服。

******************************

食譜：- 約六至八人用 (太多就將份量除二啦 ^^" )

材料：
花旗參  -  1兩
生熟薏米  -  各1兩
沙參  -  1兩
淮山  -  1兩
海竹  -  1兩
南北杏  -  6錢
無花果  -  8粒
湘蓮子  -  2兩
蜜棗  -  6粒
瘦肉  -  1斤

我的做法：
1. 瘦肉汆水備用.
2. 將剩餘材料沖水洗﹐緊記要檢查每粒湘蓮子已除去芯 (否則會有苦味).
3. 將所有材料放入六公升的滾水﹐待水滾後用中火滾 15分鐘.
4. 轉細火煲多二個半鐘﹐落鹽吊味即成.

唔簡單嘅薯仔火腿沙律 (附食譜)

『薯仔』算得上係我鍾意食嘅其中一樣﹐記得讀書住喺宿舍﹐學校一星期總有四晚或以上都有薯仔﹐不但止冇厭倦仲百吃不厭﹐愛上了<3 有美式焗薯、白汁忌廉焗薯片、碎牛肉焗薯…等等。我唸肥嘟嘟嘅自己真係太愛吧!! 冇錯…食太多的確會令人變肥﹐包括我 hehee… 所以最高峰時體重重達一百三十磅﹐腰圍三十吋多﹐要幾肥有幾肥﹐唸起都覺得太可怕喇!! XD

哈哈﹐其實又唔係真係咁恐怖﹐只要唔好食過量﹐係唔會變成我以前咁嘅 XP
試吓呢個超好味嘅食譜啦﹐試過後您就會明白有幾唔簡單。

******************************

食譜：-

材料：
三花旅行火腿 半罐
洋蔥 1個
薯仔 5個
蛋黃醬 300ml
練奶 1湯匙
鹽 少許
煙肉碎 少許

做法：

1. 薯仔切粒烚至淋身備用.

2. 洋蔥、火腿切粒後混入薯仔粒.
3. 先加入少許鹽輕輕攪拌，加入蛋黃醬及練奶拌勻.
4. 入盒，灑煙肉碎上面即成.

好友歡聚星期六

今晚去朋友屋企飯聚﹐由小妹親自下廚煮幾味泰菜比大家試吓 (●´3`☆★´ε`●)

 

喺廚房埋頭苦幹一輪終於食得喇 ヾ(@^▽^@)ノ 獻醜﹗飲杯 Cheersssssss.................

 

『泰式冬陰功』~ 好味好味… ლ(´ڡ`ლ)

 

『泰式酸辣鳳爪』~ 呢個仲好味呀 ლ(´ڡ`ლ) 酸辣都夠味啱晒我 (≧▽≦)

呢個之前一晚已經要醃定﹐過一晚夜會入味 d ﹐遲吓先補返個食譜同大家分享 ╰(*´︶`*)╯♡

『辣椒膏藕片炒梅頭肉』~ 呢個簡單得嚟都好好味﹐原來我地幾個都好鍾意食蓮藕﹐眨吓眼就冇晒嚕 Yeahhh.... ヾ(●´▽`●)ﾉ彡☆

簡單講吓煮法：梅頭肉切片略醃。蓮藕切薄片。用少許油將梅頭肉炒至七乘熟﹐盛起備用。可以用返同一個鑊加少許油﹐加泰國辣椒膏推開後落蓮藕片炒，再將梅頭肉回鑊炒至熟透﹐落鹽吊味就 OK 喇 (●´∀`●) (用梅頭肉肉質腍 d )

『青咖哩雞湯米線』~ 呢個今次失左水準﹐唔係好夠味 ~ 淡口左 d ﹐之前喺屋企煮過都好夠味﹐唔知係咪包青咖哩唔同牌子﹐我之前嗰包喺泰國 d 超市買﹐下次再研究吓先。哈哈~ 不過朋友話下次不如用冬陰公湯伴米線好似仲正喎 ╰(*´︶`*)╯♡ 您地點話點好啦﹗

咁大碗… 唔知以為我餓左九年 (*￢ε￢*) 我都係為左影張相啫 ~ 嘻嘻﹗

同好朋友一邊食飯一邊睇金像獎﹐好開心… 仲有華仔呀 )))) (*´З`) 鍚啖先

之後仲有美女廚神應主人家要求整左個『尖椒皮蛋』成為了我地嘅宵夜 ლ(´ڡ`ლ) 正正正~

估唔到係… 仲有額外收獲﹐開心屎唷 (>∀<●) 多謝晒 ^3333^

有美女廚神送嘅花花褲﹐好靚好靚… 大愛啊﹗遲 d 等我著比您地睇… ヾ(●´▽`●)ﾉ彡☆

仲有主人家送嘅眼膜﹐您梗係知我夜瞓有熊貓眼喇 ~ 哈哈﹗同一 d 台灣零食 (零食已排出體外冇相睇 >.<) 886

四物煲鴨湯 (附食譜)

及時進補… ヾ(●´▽`●)ﾉ彡☆ヾ(●´▽`●)ﾉ彡☆

幾經辛苦先見到有鴨買﹐就算去到新鮮雞檔都冇得買…要訂第日先有喎 (*￢ε￢*) 真係誇張﹗ (仲要擔心都唔知係咪新鮮 =.=" ) 有意無意見到超市有冰鮮買﹐嗱嗱聲叫姐姐幫我去皮斬件一開四。原先… 我叫個姐姐幫我掉左個頭佢﹐佢問我隻鴨用嚟做咩﹐我答佢煲湯﹐佢就話個頭用埋嚟煲湯先好… (仲有過百字唔打)… 您唔食先掉左佢。 我答：哦哦哦﹗好啦好啦~ 咁佢好醜樣嘛 >.<"" 姐姐繼續強調要用埋嚟煲湯… 好好好﹗我投降﹐我信您﹗﹗･ﾟﾟ(p>д<q)ﾟﾟ･
哈哈~ 講真﹗您經驗一定多過我嘅﹐多謝您袋錢入我袋吖 o((*^▽^*))o

煲嗰陣已經聞到 d 當歸香 ╰(*´︶`*)╯♡ 最愛藥材湯唷~~ 煲出嚟係咁樣黑蚊蚊架﹐但唔駛理﹐最緊要好味道… ლ(´ڡ`ლ) ლ(´ڡ`ლ)

根據維基百科解說：-

四物湯是傳統中醫流傳下來的藥方，最早出現記載於宋朝的「太平惠民和劑局方」。而四物湯就是使用熟地黃、白芍、當歸及川芎這四種中藥材。一般來說，它具有補血調經的效果，可減緩女性的經痛。

******************************

食譜：- 約六至八人用 (太多就將份量除二啦 ^^" )

材料：
當歸  -  8錢
熟地  -  8錢
川芎  -  6錢
白芍  -  6錢
紅棗(去核) - 10粒
南棗 - 2粒
鴨(去皮) - 1隻

我的做法：
1. 所有藥材、紅南棗沖洗乾淨備用.
2. 鴨先請檔主去皮斬件﹐汆水.
3. 將所有材料放入六公升的滾水﹐待水滾後用中火滾 15分鐘.
4. 轉細火煲多二個半鐘﹐落鹽吊味即成.