今日呢幾味餸菜
我覺得太大滿足感 好靚又好味
就算用嚟宴客都絕不失禮
但係… 以下一部份嘅餸
我都係喺屋企樓下間惠康超市買入
有部份當然係屋企原先嘅存貨啦 XD
假日時間多 D 可以花 D 心思去整吓餸
唔使趕頭趕命都幾好架
自己可以過足癮 Honey 又食得開心 ^3^
平時我真係好少整魚
尤其係原條
事關我見到佢對眼望住我 我就驚
今日竟然比我見到有花尾龍躉同東星斑買
拎住兩包魚猶豫左好耐
哈哈 ~ 再終都係揀左東星斑
返嚟洗淨 用廚紙印返乾
再輕輕撒上少少海鹽吊味
水滾大火蒸佢 10 分鐘
煮埋個熟油魚汁就大功告成
好正好正！
Daddy 見到就打嚟問我韌唔韌
我話唔韌喎
佢話望落好似蒸過龍
叫我下次蒸 8 分鐘 熄火焗多 1 分鐘就可以
哈！我見佢咁大舊
驚死佢唔熟咪蒸耐 D 囉 XDD
OKOK 就咁決定啦
希望下次再買到啦
Oh.. 係呀！佢都係 HK$80
我覺得又唔貴 OK 喎！
『清蒸東星斑』
早前買左盒日本蛋
日本蛋嘅質量真係靚好多
其實真係唔貴好多啦
平時我會加鮮奶/鮮忌廉去蛋漿度
不過又唔想買盒用得少少喎 見有雞湯剩
用左三隻日本蛋加左少少雞湯
蝦仁就喺惠康買
返嚟沖水 挑去腸 洗淨後略印乾
再搵少少海鹽同生粉醃左陣
先炒熟蝦仁 盛起
再用中小火炒蛋至半熟
蝦仁回鑊 將蛋同蝦仁拌勻
(拌幾吓時 D 蛋已經又熟左D)
落少許海鹽吊味 就可以上碟
*我習慣煮至八分熟
Honey 見到滑蛋炒蝦仁就好開心
佢話呢 D 係兒時味道喎 ^^~
『滑蛋炒蝦仁』
屋企有 D 竹笙存貨 諗吓可以整 D 咩
上網見到嚟去都係釀蝦膠或者時蔬
去到惠康見到有鯪魚肉
靈光一閃 釀埋露筍同紅蘿蔔都唔錯喎
釀起嚟會更加漲卜卜
嘻嘻… 膽粗粗就買返去玩吓
竹笙用水浸軟 洗淨瀝乾 切去頭尾
煲滾水加薑片汆水2分鐘瀝乾備用
露筍、紅蘿蔔切條
水煮滾加入露筍、紅蘿蔔汆水1分鐘撈起浸凍水瀝乾
鯪魚肉放入食物袋剪一小角
竹笙打長剪開 用抹手紙印乾 拍少許生粉
唧入鯪魚肉 加入露筍、紅蘿蔔
再唧入鯪魚肉 用竹笙包住
水滾大火蒸6分鐘
上湯、蠔油、糖煮滾 打芡 淋上面即成
『鯪魚肉露筍釀竹笙』
係咪好靚呢 (心心眼)
又健康喎
只要花 D 心思同心機就可以架喇
今晚懶豬冇煲湯
咁好味嘅三餸應該收貨喇呱 ^^
