假日自家煮

我實在太鍾意煮野食﹐放假前夕﹐一早已經唸定煮咩食﹐買好材料。

午餐… 就簡簡單單整左個『芝麻汁肥牛露筍卷』、『燒汁煎雞扒』配『拉麵』。

晚餐… 買左『明太子』做前菜﹐整左『日式咖哩牛肋肉』、『土匪雞翼』﹐再『煎印度薄餅』、『烏冬』用嚟配個咖喱汁一齊食。^_^ 就係咁… 簡簡單單﹐又有得過手癮煮野食﹐呵呵~ Good Good Good...

青咖哩三文魚頭

~舊文~

之前喺泰國買左兩包青咖哩返嚟一直都未有機會整。泰式野我未算煮得好耍家﹐但離不開都係泰國嘅調品料。其實呢個『青咖哩三文魚頭湯米線』唔算難整﹐材料有 ~ 三文魚頭、豆卜、金菇、草菇﹐仲有朋友愛食嘅泰國茄子… 再烚埋個米線就 ok 喇。

天氣凍﹐除左打邊爐﹐整個咖哩鍋都唔錯。下次試吓煮雞件﹐三文魚頭好似有 d 膩﹐不過個味道非常好… 超正。

有飯食有湯飲又溫馨﹐多好﹗ (附食譜)

如果時間許可﹐我盡可能每星期都會煲一次湯﹐除左我好鍾意飲湯之外﹐我覺得湯水總比護膚品強﹐飲完面色都紅潤。嘻嘻﹗今次煲左『舞茸首烏黨參煲豬展』﹐好正好正﹐我最愛藥材湯﹐呵呵呵﹗

咩都想食﹐最好就自己煮﹐又溫馨﹗有『蒸腊腸潤腸同咸魚』、『涼瓜炆排骨』、『茶樹菇蒸雞』同『蒸鲩魚』﹐哈哈哈﹗兩個人食咁多野好誇張呀 ~~~ 好開心好開心

******************************

食譜：- 約六至八人用 (太多就將份量除二啦 ^^" )

材料：

舞茸  -  2兩

杞子  -  1兩

首烏  -  1兩

黨參  -  2兩

南棗  -  4粒

豬展  -  1斤

我的做法：

1. 所有藥材沖洗乾淨備用﹐舞茸浸軟洗淨.

2. 豬展汆水.

3. 將所有材料放入六公升的滾水﹐待水滾後用中火滾 15分鐘.

4. 轉細火煲多二個半鐘﹐落鹽吊味即成.

鬆弛熊 ~ 馬卡龍

小玉見到有家烘焙學校有得學馬卡龍

仲要係佢至愛嘅鬆弛熊喎

佢 Send 左條 Link 比我睇 (哈哈﹗咁即係想我陪佢去學囉)

馬卡龍喺早早年前我已經學過

不過一直唔太大愛食

學完之後都冇點再整過嚕

好啦好啦﹗學多一次當練習吓啦

去到間烘焙學校感覺好一般

可能已經習慣左喺啊佛間紅色廚房太多年

感覺寬敞 D 同埋有熟悉嘅親切感

曾經都喺出面其他學過 教程 環境都一般

其次係我覺得啊佛教得好好 係一個有料嘅啊 Sir

地方乾淨各樣配套又齊全 最好就係近我屋企

Anyway ~ 就試吓呢個吧﹗

其實整個堂教得好快 好多野都已經準備好晒

自己都好似冇做過 D 乜野咁

Hm... 有好有唔好啦﹗

因為自己做嗰陣時萬一有問題就會唔識處理

打好個漿就可以唧返鬆弛熊個型出嚟

(有圖案字喺底 只係跟住唧就可以)

風乾後就可以拎去焗

焗完之後就可以用學校已調好色嘅糖霜畫埋個樣

就可以唧餡漿夾埋就可以囉﹗

(重點係~ 糖霜冇教點調 個餡料又冇教點整 =.=")

真係想知 其實係上實戰堂定聽講座呢？

比我個咁感就係衝鋒陷陣聽佢一輪咀講

然後做左嗰一兩樣野就叫自己整？﹗

幸好 我之前都學過 所以叫做打左底

明白佢講乜野 唔係… 應該會有部份人吸收唔切

再者佢個食譜又簡單一 D 都唔 Pro

鍾唔鍾意呢種教學方式見仁見智

制成品搞掂喇 係咪好靚好可愛啊 ^^

呵呵﹗梗係啦~ 邊個整先得架 Heheheeee.........

(傻左)

FLAVOURS HONG KONG

枝竹羊腩煲 (附食譜)

細細個食 Daddy 煮嘅羊腩煲已經覺得超好味﹐我仲記得佢喺用電飯煲炆羊腩。我 Daddy Mammy 煮野都好好食﹐可能有 d 遺傳 (兜左個圈讚自己添) 哈哈﹗

我未試左自己整羊腩煲﹐好想試吓… 寫好晒材料就去街市買。

知道新鮮同冰鮮羊腩都得﹐我就買左新鮮﹐不過好貴﹐要成二百蚊一斤。算啦﹗又唔係成日食﹐可能真係好味 d 呢？﹗(自我安慰 ing) ~.~""

材料同備料功夫都幾多﹐搞左一大輪先可以開始去煮…

二斤羊新鮮羊肉比我想像中都唔算好多… 不過第一次﹐試下先 ^^"

經過幾個經﹐我嘅羊腩煲已經面世喇﹐Yeah~~ 唔係講笑﹐真係好好味﹐同出面嗰 d 有得揮呀﹗自己鍾意食咩又可以加多加少… 搞左成晚﹐呢碗已經變左做我嘅宵夜 very good ~ yummy…

******************************

羊腩煲食譜

材料:

新鮮羊腩2斤 (冰鮮亦可以)

枝竹,  馬蹄,  冬菇,  冬筍 (按自己所需),   臘鴨髀1隻,  薑300g (1斤羊約150g)
陳皮1片,  南乳1包,  柱侯醬適量,  糯米酒 or 紹興酒

做法:

~枝竹浸透切段備用 // 馬蹄去皮浸水 // 冬菇浸軟去蒂 // 冬筍去皮切件

~臘鴨髀略浸後剪去週邊的皮再斬件// 薑去皮切厚片
~陳皮浸軟刮去囊

1. 羊腩汆水再徹底洗乾淨,  用白鑊 (唔加油) 炒一次羊肉至乾身﹐加入酒兜均盛起備用.

2. 燒紅鑊加油爆透薑片﹐盛起備用.
3. 加油先爆香南乳﹐ 用鑊鏟推散﹐再加入一大匙柱侯醬﹐再放入薑片略炒﹐放羊腩、臘鴨髀拌勻。再加入其他配料 (支竹除外).
4. 落晒所有材料加水﹐ 要剛好蓋過所有材料﹐大火滾.
5. 水滾後轉細火炆一個鐘﹐熄火焗一個鐘﹐再煮滾後再炆半個鐘﹐再熄火焗半個鐘就可以試味 (唔夠味可以加柱侯醬).
6. 最後加入枝竹炆多四個字至半個鐘﹐待枝竹腍就 OK 喇. ^_^