冬菜碎牛肉粥 @ 半步不出門 (附食譜)

呢句說話出自我口中無數咁多次：我最怕早起身﹐都唔知點解揀左份寫字樓工仲要做左咁多年。

難得放長假攞正牌夜瞓﹐要好好享受唔駛早起身嘅假期﹐可以瞓到自然醒就係最爽嘅事。冇朋友敢相信我瞓覺可以瞓咁耐﹐(細細聲：今日我瞓醒時已經天黑囉)~ 哈哈﹗超爽 XDDD 好犀利呢~

呢幾日都落住雨﹐今日仲落到傻左… 好彩一早買定材料唸住煲粥食。呢個粥我好耐都冇煲﹐早幾日突然心血來潮想食﹐想食就食吧﹗

『冬菜碎牛肉粥』

******************************

煮粥前一晚的準備：- (懶人做法﹐米就會快 d 開花 ^^" )

- 米洗淨加少許油、鹽、水放入雪櫃 (水要浸過米)

- 免治牛肉加糖、生抽、粟粉、水同油撈均﹐放埋入雪櫃醃.

- 第二日﹐取出所需冬菜浸水、換水﹐重覆數次.

- 煲水﹐水滾落米大火煮約四十五分鐘至米開花. (要用個高身煲﹐唔係會彈到四圍都係)

- 加回冬菜同免治牛肉煮多十分鐘﹐落鹽吊味即成.

清潤雪耳雪梨湯 (附食譜)

呢排好心歸﹐唔係本身約好﹐冇咩特別事都唔想出去。

今日狂風暴雨天都黑晒﹐雖然返埋今日就開始放四日復活節假﹐但都係想返屋企休息吓﹐可能之前嚴重缺眠 ( 失眠 ~.~" ) 搞到個人好攰。收工時又好好彩一滴雨都冇﹐好有 mood 咁走去買野煲湯﹐去完街市去超市﹐返屋企嗱嗱聲煮左個雞扒拉麵食。

再開檀備料煲湯… ^o^v

******************************

食譜：- 約六至八人用 (太多就將份量除二啦 ^^" )

材料：

百合  -  2兩

南北杏  -  4錢

雪耳  -  1兩

雪梨  -  4個

紅蘿蔔  -  2條

瘦肉  -  1斤

  

我的做法：

1. 百合、南北杏沖水﹐雪耳浸發洗去蒂部污物.

2. 雪梨洗淨切件去芯﹐紅蘿蔔去皮切件﹐瘦肉汆水.

3. 將所有材料放入六公升的滾水﹐待水滾後用中火滾15分鐘.

4. 轉細火煲多兩個半鐘﹐落鹽吊味即成.

與細老表小聚

細老表第一次嚟我屋企食飯﹐順道拎我為佢整嘅至愛『馬豆糕』﹐大家都要返工﹐收得工嚟都夜﹐所以簡簡單單整左幾款菜嚟招呼佢。下次等有多 d 時間準備先再煮整其他野比您食呀 XP

今年仲收到個好消息就係得知您要結婚﹐衷心恭喜您成家立室呀 ^3^ 五門終於出一傑﹐Hahahaa ~ 傾傾講講又三個幾鐘﹐好開心… 多謝您嘅到來 ^^~

『新鮮薯仔蓉焗田螺』。『黑松露白汁磨菇意粉』。『香煎三文魚』

煮野食都係我由細到大嘅興趣﹐您鍾意嘅您會發現係一種樂趣。五年前開始入門學做甜品蛋糕﹐其實我對甜嘅野不嬲都麻麻地﹐唔知點解嗰陣咁有 mood 走去學﹐不過都好學多門手勢﹐反正自己又鍾意整﹐身邊嘅人食得又開心。

細老表對甜都係唔大興趣﹐以前我整 d 芝士餅或者其他甜品比我大老表佢都冇乜興趣﹐唯獨係呢個佢最鍾意食﹐所以耐唔耐都會整比佢地一家人食 ^^ 大家開心就好。

發菜蠔豉雞腳煲豬骨

幾懶都要迫自己每星期煲一次湯﹐其實都係抽少少時間準備 d 湯料﹐準備好晒後放入個煲已經唔駛理佢。煲左大半個鐘﹐成間屋已經充斥住陣蠔豉香味﹐好犀利 =) 煲多兩個鐘就有得飲囉﹐幾容易。

咁啱整親隻腳﹐就煲吓呢個湯水『發菜蠔豉雞腳煲豬骨』補補佢 hehee…

私人空間

夜深人靜又未瞓得著﹐一邊聽住音樂﹐一邊更新網誌。

肚子餓… 走去廚房睇吓有咩可以食﹐突然 mood 到煮左個『黑松露磨菇炒蛋』再配埋杯紅酒… 何其享受﹐好 enjoy 呢 d 感覺﹐一個人在享受屬於自己嘅私人空間 =)

幸福其實可以好簡單… 就是正正如此。