好耐都冇試過請朋友仔上嚟屋企食飯
今次來個小型嘅 Housewarming Party 請 D 朋友嚟食吓聚吓
我仲好有心機整埋個 Menu 添呀 XP
好耐都冇試過煮野食比咁多人
連啱啱喺泰國返嚟嘅零食都出動埋
有咩都拎晒出嚟招呼朋友
食住零食拖延吓時間
等我好好為您地準備一餐美味嘅晚餐啦
呢個沙律簡單得嚟又好味
鍾意食咩就加咩蔬菜配料 轉個頭就冇晒
亮點其實係個汁 ~ 美味醒胃
有興趣就好好抄低呢個食譜喇 ^_^
份量應因個人喜好作加減 ~ 以下給大家參考
橄欖油 60ml、香醋 40ml
蒜頭 1-2 瓣、紅洋蔥 1/4 個、新鮮甜羅勒 3-4 片 (全部切碎)
檸檬胡椒粉 (1/2 tsp)、海鹽 (1/4 tsp)
將以上原有材料拌勻即成
呢個『香草田螺焗薯蓉』又一正到冇朋友之選
好好 ~ 等我又分享吓呢個點做好嗎？﹗
唔好都唔得… 我要逼您地睇 XDD
薯仔烚 30-45 分鐘 (用試針輕易插過就代表 OK)
取出待涼一陣就順便去埋皮
用叉子或者薯蓉器壓爛變成薯蓉
加入少許海鹽同胡椒粉拌勻
再加入脫脂奶拌勻至自己喜歡的稀杰狀態
放入焗盆舖好備用
罐頭田螺肉一罐 用水沖洗幾次後澀乾
兩瓣蒜頭切碎 開一鑊 加油用中火將蒜蓉爆香
加田螺炒一兩分鐘 加入乾香芹碎、海鹽同胡椒粉不停炒
炒多一兩分鐘 聞到有香草香味就可以熄火
將田螺放上焗盆內嘅薯蓉面
加少許牛油丁喺薯蓉面嘅四周
先預熱焗爐至 220 度 用 200 度焗 15-20 分鐘即成
最後可撒上乾香芹碎裝飾
『蒜香白酒汁煮西蘭花拼磨菇』
呢個做法其實同我平時做意粉汁一樣
只係將洋蔥換左做蒜蓉 同埋收汁唔需要去到咁杰
『紅酒汁燴牛肋肉配香酥薄餅』
雖然我唔食牛 但都要照顧吓 D 朋友仔
呢個炆牛肋肉可以早一日做定
放雪櫃 第二日再煮返熱就快好多啦 ^^
好靚嘅車厘茄仔呀 ^3^
都唔記得留起幾粒嚟撈沙律食添
Woowoooo....
好多新鮮蔬菜呀﹗ ﹗
有三色椒、紅洋蔥、甘筍、西芹、原粒蒜頭
知唔知道我整咩呢？？
係『秘制香料烤雞腿』呀﹗ Yeah~~
將醃左過夜嘅雞腿放埋上去
加埋 D 靚靚車厘茄仔同檸檬片就成功左大半喇
呢個我都係第一次整
要多得煮野食好叻嘅 S 小姐嘅分享同教我
可惜我買唔齊佢用嘅調味料
所以買左支綜合調味料 (下圖)
再加左 D 蒜粉、孜然粉、紅椒粉、黑胡椒粉、海鹽同橄欖油
用保鮮袋包起醃過夜
哈哈 ~ 其實我係亂嚟 又驚唔夠味 又驚太重味
唔理得咁多 >"< 試吓啦
用 200 度焗左 40 分鐘
哎呀 ~~~ 出事喇
S 小姐教我中途要打開蓋掃吓 D 醃雞嘅汁上雞腿面
我完全冇左回事囉
個面好乾啊 而且望落都燶左 D 啊
不過呢個烤雞好好評啊 入味得嚟又啱啱好
呼 ~ 好彩咋
朋友話近骨位置好似有 D 唔熟 +_+"
好啦 ~ 咁我下次用餘溫再焗多陣啦 XP
最後一度菜喇…
甜品嚟喇﹗ 咩嚟咩嚟？？
之唔係……
『法式焦糖燉蛋』(Crème brûlée) 囉
正唔正？得唔得先？
女士們都係最愛食甜品
個個都讚好味又做得好滑
Yeah Yeah 真係開心屎我吖
雖然整呢餐都真係幾辛苦
不過見您地鍾意食咩都抵返晒啦 ^3^
~ 終於打完收工 ~
******************************
法式焦糖燉蛋食譜 (Creme Brulee)
材料:
牛奶 100ml
砂糖 70g
雞蛋 1隻
蛋黃 4隻
淡忌廉 400ml
雲呢拿 1條
砂糖 適量 (燒焦糖面用)
鮮果 適量
做法:
1. 雲呢拿條先用刀背壓平, 再剖開挖出黑色的雲呢拿子.
2. 將雲呢拿子及雲呢拿條放入牛奶中一起煮滾, 放涼備用.
3. 雞蛋及蛋黃輕輕拌勻, 加入砂糖攪拌均勻.
4. 加入已放涼的牛奶入蛋液中拌勻.
5. 再加入淡忌廉拌勻. (淡忌廉不須打起)
6. 過篩後倒入小焗盤.
7. 放入已預熱150度的焗爐內座水焗30分鐘至蛋漿凝固.
8. 取出放涼後, 可蓋上保鮮紙放入雪櫃冷藏.
9. 食用時將適量砂糖平均灑在燉蛋上, 用火槍燒至金黃焦糖色即成.
