今次買左呢隻日本蛋試吓
不嬲都話日本蛋好好食
蛋味香濃 蛋黃顏色又夠金黃
如果做煎蛋 仲會見到個蛋黃好挺身 好得意
我形容佢好似個 BB Pat Pat 咁架 XD
真係物有所價呢！
原來我從未做過溏心蛋架喎？！
即時上網搵吓食譜
又綜合吓各人嘅經驗
揀左幾個做法同食譜… 加加減減
希望大家鍾意又啱用啦
噢！唔記得介紹今晚呢個日式快餐
有喺 759 嘅鹿兒島拉麵 (長期支持者)
HK$12.5 有交易 仲要係二人前 係咪好抵先？！
Citysuper 有售嘅大阪王將餃子
食左十年多超正~
記得之前都係賣 HK$28
啱啱買呢包要 HK$38
原因係個餃子皮底部已經一早注入左水同油
喺冰箱冷藏 做左個模咁
一放入平底鑊煎 5 分鐘就食得
而且仲可以做到個特別效果好似喺出面食咁
咁都值得嘅！
*(唔記得影個餃子未煎前嘅樣 ~ 遲吓再補上)
係呀！仲要攞埋唔知咩咩金獎
所以唔加價有鬼囉 ~
好啦 ~ 講返個主角溏心蛋先
我地先煮個滷汁
250ml 水 + 80ml 日式豉油 + 80ml 味淋
用小煲加熱後熄放就可以做浸蛋個汁
記得要完全放涼呀
今次先試煮 6 隻蛋
蛋要預先拎出嚟回溫 (唔要凍蛋)
煮一煲熱水 (我用平時嘅煮麵煲)
水滾後加入一小杯室溫水稍微降溫
用勺將蛋輕力加入
即刻計時 5 分鐘
呢個時候可以準備一大碗多冰冰水
5 分鐘後熄火 將蛋乘起加入冰水
防止雞蛋有餘溫 會熟過龍
浸佢幾耐其實冇咩所謂
總之您拎上嚟 Feel 隻蛋凍晒就可以剝殼
點知 ~ 原來呢個先係最難
六隻裡頭得兩隻係光滑完正
其他都被我剝到花晒… 好黐殼吖
剝晒之後忍唔住即刻食左一隻 (係最醜樣嘅一隻)
Yeah!! 就係我想要嘅生熟度
好好味吖
最後將滷汁加入剝殼溏心蛋度
浸過夜第二日就可以食得喇
依家自己識整
我唔會再喺拉麵舖加錢食溏心蛋 XD
太好味！一定要再整先得 (大滿足呀！)
