早排有長假可以長嘆一番
主力當然係喪眠啦
我同老公都係夜瞓 又瞓得吓嘅人
平時返工兩點幾先瞓
假期就更加放肆… 三、四先會瞓
之後又瞓到第二日嘅點幾兩點先會醒
的確係好爽呢！
放假有時間多
我都鍾意去買餸煲吓湯煮返兩味
盡吓做人妻嘅責任
『蝦子滑蛋蝦仁豆腐』
蝦仁挑腸 洗淨備用
豆腐輕輕過水 切粒備用
蛋兩隻打發後備用
加油先炒熟蝦仁 加豆腐及約150ml 雞湯
加鹽同胡椒粉
煮滾後埋茨 慢慢打圈倒入蛋漿
熄火靜止 2-3 mins 待蛋熟就可以上碟
見雪櫃仲有 D 用剩嘅蝦子
用平底鑊烘返熱同乾身
曬上面 ~ 又另一番味道
老公話想食冬瓜
冬瓜煮餸我都好少
係最記得小時候婆婆會用燒肉/火腩嚟一齊煮
『冬瓜炆火腩』
先爆香蒜頭 6 粒盛起備用
用 2 片薑起鑊 加入火腩炒香
再加入冬瓜同水 (水剛好蓋過面就可以)
蒜頭粒回鑊 用中火炆 10分鐘至冬瓜熟透及收汁
加鹽調味即成
喺街 ~ 我叫老公唔好點娃娃菜之類嘅餸
因為我知道買係好平 所以我覺得好唔抵
叫佢點 D 我煮唔到嘅野 ~ 哈哈哈！
那我就好好補償給您 XDD
『杞子魚湯浸銀絲菜』
『章魚節瓜雞腳湯』
三餸一湯 交足功課呢 ^3^ 唔好太愛我啊~
