之前喺泰國旅行時
拜師學藝左幾味泰國菜
No No No... 講得巴閉左！
其實我只係去左曼谷
學左一堂泰國菜咁大把 XD
之後老表們知道都話想試吓喎
小女子當然聽聽話話就犯啦
出事喇~
出事在於晚餐安排喺星期五嘅晚上
因為星期五大家都要返工… 包括我
之前已經知道會唔夠時間
所以可以預早準備到嘅 我都已經準備定先
之不過… 急！又點會有好野食吖
就講呢個『泰式酸辣鳳爪』
我做過 N 咁多次 都冇乜幾何失敗
哼~ 呢次就中招嘞
因為兩個表哥同情人都唔食得好辣
就落少 D 就就… 就到唔夠味添 >"<
除左呢個出事 之後仲陸續有嚟 (大哭)
放工先返屋企整 仲要請客
時間實在太急趕
我之前嗰一兩日已經買好晒野
收工已經九秒九衝返屋企開工
之後表哥、家姐隨即就上到嚟
緊張~ 緊張~
始終太大壓力我都係唔得 ~ 失晒準
(我都唔知原來連呢 D 壓力都承受唔到 ~ 哈哈 XD)
先做左個『冬蔭功湯』比大家飲
原來唔記得影相添
做左一大鍋 不過我覺得好似爭咁 D 味
『泰式青咖哩雞』
汁太多 多到… 一大鍋 ~ 哈哈
好彩我焗左 D 蒜蓉包比大家食
又可以蘸吓汁 都叫 Yummy 嘅 (自欺欺人)
『香茅雞中翼』
預先一晚就加入鮮香茅同其他調味料醃定
當晚一煎就可以
可惜經驗不足
太多香茅碎黐住隻雞翼 搞到煎嗰陣好易燶
而且煎出嚟嘅色水太淺色 真失敗
細表哥佢就話好味又夠味
D 泰國青瓜 佢第一次食~ 覺得好味喎
佢應該喺泰國食過架？！
個雞翼我只係好簡單
切左 D 香茅碎同支 加左 D 魚露、糖同鹽
我用左兩個保鮮袋包住 乾手淨腳
放雪櫃醃佢過夜
第二朝返工時
將佢成包倒返轉 等佢入味得平均 D
呢個係成晚唯一一個我覺得冇失準嘅菜
『辣椒膏炒蓮藕豬頸肉』
辣椒膏香而微辣 蓮藕片爽口又好味
原先想整馬拉盞炒通菜
點知買唔到馬拉盞
就簡單 D 做左個『蒜蓉炒通菜』
終於嚟到尾升喇
買左兩隻好貴嘅水仙芒
做左呢個『芒果椰汁糯米飯』
雖然我好飽 但呢個我愛唷
今晚嘅水準的確意料之外地失準
時間唔夠又心急 總知就亂晒大龍 XDD
不過都多謝您地今晚非常賞面
過左一個好開心嘅晚上 ^3^
臨尾大家都幫我手一齊清理
家姐仲幫我倒垃圾
之後我就送佢地落樓搭車
返到屋企 我發現少左 D 野 (抓頭)
原來家姐將我喺 Homeless 買返嚟嗰個垃圾桶掉左去後樓梯
佢誤以為嗰個係一個唔要嘅垃圾袋！
其實… 呢個係 Design 嚟架囉
我地喺個 Whatsapp Group 度瘋狂笑左超耐
真係好搞笑
上嚟食餐飯 連個垃圾桶都掉埋我
XDDD
