第一堂 @ 熱情果朱古力慕士蛋糕

Passion Fruit Chocolate Mousse Cake

又同一班餅友仔去上堂﹐今次學左一個步驟好多好複雜嘅『熱情果朱古力慕士蛋糕』﹐一共有七層… 犀利呢﹗您剩係睇吓下面嘅步驟就覺得頭暈。

每一次上堂都喺度唸﹐咁複雜我一定唔會喺屋企做﹗我學呢個蛋糕係我對製造過程嘅技巧比較有興趣﹐學左呢 d 技巧就可以運用喺其他唔同嘅甜品上。

仲有要多謝餅友仔您地嘅伴手禮﹐多謝晒呀﹗正呀﹗

核桃蕉蕉瑪芬

見到起梅花點嘅蕉最好就係整香蕉蛋糕或者係 muffin﹐夠晒香~ 尋晚一口氣焗左 24 個 muffin 打算送比朋友仔同同事食… 以為一齊安好﹐點知一盆 12 裡面有 8 個都燶底﹐呀 ) ) )  激死人喇﹗好啦~ 再焗第二盆調低 d 個溫度啦﹗點知都係一樣…… 燶底呀﹗唉~ 唯有要 d 同事挨吓義氣﹐唔好嘥都食啦﹐最多唔食個底囉﹗見得人果d就包起佢送比朋友仔。

杯杯裝 - 藍莓芝士餅 (附食譜)

同事之前做了呢款芝士餅請左一件我食﹐Yummy… 就係呢種味道﹐我鍾意呢種芝士味亦都鍾意呢種芝士餅嘅質感﹐我一定要自己做出嚟。I Love it ~~

為左方便帶返公司﹐焗完之後再轉左外賣杯杯網﹐好靚~ 雖然比起做一個六吋工序係多左﹐不過都好過到時先切同分吖﹐係早懶同遲懶嘅分別。哈哈~

******************************

食譜參考：『日嚐甜品』

焗藍莓芝士蛋糕  Baked Blueberry Cheeseckae

(2吋模 x 8杯) OR  (6吋模 x 1個)

材料 - 餅底：
消化餅乾碎 60g
無鹽牛油溶液 30g

材料 - 中間芝士餡：
忌廉芝士 330g
砂糖 75g
雞蛋 100g
無鹽牛油溶液 75g
淡忌廉 35g
雲呢拿油 1/4茶匙
材料 - 上層：
藍莓果餡 隨意

做法：
1. 先將模底層包上鍚紙.
2. 消化餅乾碎加無鹽牛油溶液拌勻放入模內壓平﹐ 備用.
3. 焗爐預熱170度.
4. 用中速將忌廉芝士打至軟身﹐分數次加入砂糖繼續打勻.
5. 拂打雞蛋﹐分2次加入忌廉芝士中.
6. 無鹽牛油溶液用隔篩倒入芝士混合物﹐再用膠刮拌勻.
7. 加入淡忌廉拌勻﹐再加入雲呢拿油.
8. 將混合物倒入模內.
9. 用焗盆座水(約2-3mm高)﹐以170度入爐焗30-35分鐘.
10. 放涼後脫模﹐加入藍莓果餡再放入雪櫃數小時即成.

搓包包 x 累鬥累

終於等到上麵包堂﹐非常開心嘅一晚。對麵包毫無概念﹐未學過未做過所以有d緊張。我究竟會做成點呢…？

搓包嘅過程好緊湊﹐落堂嘅時間亦超時 >.< 所以原定打算落堂後送包包嘅計劃也有所改變。其實上堂當日公司已經忙過不停﹐收工後雖然抱著開心嘅心情﹐但都係帶住疲累嘅身軀。搓包嘅時候為左制成品﹐用盡我九牛二虎之力博命搓﹐心唸…我一定唔會喺屋企做﹐因為覺得蠻大工程﹐麵粉通處飛 +_+" 。

出爐後尚算安慰﹐仲見得人吧 XD 拎左一 d 返公司比同事試食﹐佢地竟然讚不絕口話好味 (即時飄飄然呢…呼~~)。睇嚟…我要再學多次﹐哈哈 (因為轉個頭已經唔記得晒 XD)

家姐生日快樂呀﹗@ 芒果芝士蛋糕

為左家姐嘅生日﹐第一次喺屋企整第一個生日蛋糕﹐好緊張啊 >.<

一邊睇住書一邊做﹐同一個食譜睇左幾十次。
揀選左芒果芝士蛋糕 (Mango Cheese Cake)﹐聽晚就要拎出去同一班好友慶祝生日…

原來喺屋企做蛋糕係件好麻煩嘅事﹐算係大 Project ！哈哈~ 可能係我嘅第一次﹐總係有d手忙腳亂。

記得將打好嘅忌廉放入雪櫃﹐但又唔記得混入芒果茸﹐就急急將忌廉倒入模中﹐搞到我一頭煙。雪好脫模時又唔記得撕走餅底張紙… 呀~~~ 癲左呀！

最後總算成功﹐呵呵~ 唯一係餅底唔夠硬身﹐嗚嗚嗚 T.T 您地覺得賣相還可以嗎？

朋友試過後話好似食緊芒果布甸一樣﹐餅底太軟﹐佢地話說可能天氣太潮濕﹐下次可以用防潮珠或者放吸濕大笨象入去喎 >.< 激氣！哈 ^^ 大家開心就好~

家姐﹐生日大快樂啊! 祝您身體健康、永遠青春美麗、開心快樂…… ^3^

一口曲奇 (附食譜)

好耐冇做過『唧花牛油曲奇』﹐屋企有罐新買嘅『三角嘜牛油』。上次做過﹐今次知道點樣去掌握唧花技巧﹐雖然唔係每一粒都唧得好﹐但都算唔錯架啦 。(自我安慰XD)

出爐後試過幾粒﹐好鬆化﹐但就係欠缺左一份牛油香味﹐點解呢？之前聽講過﹐方間有隻叫『三角嘜牛油』好出名﹐而且牛油味好重好香﹐所以我都想買嚟試吓﹐試過之後… 個人覺得都係『金罐牛油』香d﹐各有各喜好﹗您地又鍾意邊種嘅牛油香呢？

單係練唧花﹐已經練到手麻痺﹐嗚嗚嗚…還我手臂呀 )))

******************************

參考食譜：Angel Home (以下食譜稍微更改)

材料：

牛油 125g

糖粉/霜 60g

蛋白 30g

低粉 40g

高粉 75g

鷹粟粉 45g

做法：

1. 室溫牛油、糖粉/霜混合好，加入蛋白拌勻.

2. 將已篩好的粉類加入﹐拌好即停. (切勿搞拌過量)

3. 唧出喜愛的形狀.

4. 放入預熱180度的焗爐內，焗15分鐘，熄火再焗5分鐘.