煮中餐難定西餐難？
如果您問我我就覺差唔多
不過中餐食飯您唔會單單煮一個餸
兩個人都起碼兩至三個小菜… 甚至更多
西餐就可以簡單 D 快 D
一碟意粉就可以上檯 而且仲可以變得好精美
煮個意粉加 D 自己鍾意嘅材料炒埋就可以
通常我都會睇吓有咩材料剩… 要煮埋嘅
再去超市買多少少配料就成事
煮西餐買野易過中餐好多 至少唔使急住趕去街市
屋企有洋蔥、火腿同腸仔剩
再走去買包菇菇 叫做有 D 蔬菜就可以
噢﹗返到屋企先發現冇晒意粉﹗﹗
得返包貴價黑松露扁意粉以備不時之需 >"<
返左屋企又懶得再落街 好啦好啦﹗
就忍痛煮啦 ~ 正一妹仔大個主人婆
不過呢個煮法真係好好味
而且又快又簡單
比 D 信心自己試吓 如果今次煮得麻麻
下次再調教吓 D 味道就會成功
仲唔踏出您嘅第一步 ^3^
******************************
材料：
洋蔥 半個
真姬菇 1 包
火腿扒 1 片
腸仔 2 條
扁意粉 2 人份
白酒 50ml
鮮忌廉 150ml
做法：
1. 扁意粉烚好，過冷河備用。(烚意粉時間因應個人喜好或參考包裝上建議)
2. 洋蔥切小粒。真姬菇略切根部及沖洗。火腿扒切粗條。腸仔切片。
3. 開一鑊加橄欖油，將洋蔥炒香後加入火腿同腸仔繼續炒至微焦。
4. 加入真姬菇炒至軟腍狀態，就可以加入已烚好的扁意粉炒熱。
5. 最後加入鮮忌廉、白酒，撒上海鹽炒勻後試味。
6. 開始見到收汁至微微杰身，可熄火上碟。
