エンジェル: 2008

2008年12月21日星期日

攀石 Bonbon 朱古力

《冬天》對我地呢 d 整甜品發燒友﹐一定會唸起做『朱古力』。

自從上完 Johnny 堂之後都未試過喺屋企練習﹐今個假期帶病上陣﹐結果得一個『差』字﹐而今次用左香檳酒加白朱古力做餡包上70度 Callebaut 黑朱古力﹐剷朱古力底時唔夠平﹐掃色粉時上得唔好﹐沾到轉印紙個底 >.<

令到賣相唔得完美﹐但完全唔影響味道 XD 係賣相唔夠靚啫！繼續努力練習﹐下次希望做得再好 d …

我一直都好怕喺屋企整朱古力﹐因為會整到四圍好污糟﹐而且仲好油好難洗﹐嗚嗚嗚 … …

我又要走去洗嘢喇 >.< (淚奔)

2008年12月17日星期三

法式焦糖燉蛋 (Creme Brulee) @ 飯後甜品 (附食譜)

一早出街食完晚飯﹐行返屋企途中總係覺得差咁少少﹐原來係飯後甜品﹐不如整個『Crème brûlée』食好唔好 … 好!!! 返到去就用左一半份量整左三杯﹐整完入雪櫃兩個幾鐘﹐忍唔住要拎佢出嚟食﹐真係好好味啊!! ^^

甜脆茶色玻璃面﹐蛋香﹐布甸滑 ~ Yummy !! 我都覺得好正﹐下次用火槍燒糖面一定要戴手套﹐忍痛被彈左兩下﹐慘! >.<"

******************************

食譜轉貼：- 雪雪兔

法式焦糖燉蛋 (Creme Brulee)

材料:

牛奶 100ml

砂糖 70g

雞蛋 1隻

蛋黃 4隻

淡忌廉 400ml

雲呢拿 1條

砂糖適量 (燒焦糖面用)

鮮果適量

做法:

1. 雲呢拿條先用刀背壓平, 再剖開挖出黑色的雲呢拿子.

2. 將雲呢拿子及雲呢拿條放入牛奶中一起煮滾, 放涼備用.

3. 雞蛋及蛋黃輕輕拌勻, 加入砂糖攪拌均勻.

4. 加入已放涼的牛奶入蛋液中拌勻.

5. 再加入淡忌廉拌勻. (淡忌廉不須打起)

6. 過篩後倒入小焗盤.

7. 放入已預熱150度的焗爐內座水焗30分鐘至蛋漿凝固.

8. 取出放涼後, 可蓋上保鮮紙放入雪櫃冷藏.

9. 食用時將適量砂糖平均灑在燉蛋上, 用火槍燒至金黃焦糖色.

10. 加上鮮果裝飾, 完成.

2008年12月12日星期五

假日午餐

~轉貼舊文~

依家有超級廣場真係好好多﹐就係買多買少都可以由自己話事﹐就算買一個橙或者一隻蕉都得﹐慢慢揀又得﹐舒舒服服﹐一次過又可以買埋其他雜貨﹐非常方便…

買完包蠔仔﹐就唸住走去買舊瘦肉﹐瘦肉賣晒﹐得返 d 半肥瘦豬肉我又唔啱 >.< 見到舊豬柳幾靚﹐就肉檔哥哥幫我攪爛埋佢~

夜晚浸定米﹐起身就煲咗個『欖菜蠔仔肉碎粥』^o^v

2008年12月3日星期三

期待以久

~轉貼舊文~

今晚約左餅友去學『牛角包』同『肉桂卷』﹐呢堂我想學左好耐…
『包』已經唔係自己強項﹐仲要做個咁難﹐有乜辦法唔唸起我咁 Pro 既 Alfred Sir 您呢!!

好彩仲有堂﹐幾驚冬天冇包包堂上呀~

過程真係超費時同複雜﹐我真係唔咁包我會唔會喺屋企再整﹐不過學到嘅永遠都係自己…

咬落去包包層次比我想像中差少少﹐呢個係(層次) ||| ||| ||| ||| ||| 而我想像中嘅係 ||||||||||||||||||||

哈哈 XDDD 您地唔知明唔明呢 XDDD

2008年11月26日星期三

表妹牌 @ 藍莓芝士餅 (附食譜)

表哥點名話想食﹐我地做細嘅點敢唔整吖﹐哈哈 XDD 忙裡都要偷閒做個比您食﹐呢個表妹頂呱呱啦 ^o^ Yeahhh... 呢個藍莓芝士餅已經做到滾瓜爛熟﹐因為真係好好味﹐相信芝士餅當中我最鍾意就係呢款…

咁您地又 Like 唔 Like 先？ ^_<

******************************

食譜參考：『日嚐甜品』

焗藍莓芝士蛋糕 Baked Blueberry Cheesecake

6吋模 x 1個

材料 - 餅底：

消化餅乾碎 60g

無鹽牛油溶液 30g

材料 - 中間芝士餡：

忌廉芝士 330g

砂糖 75g

雞蛋 100g

無鹽牛油溶液 75g

淡忌廉 35g

雲呢拿油 1/4茶匙

材料 - 上層：

藍莓果餡隨意

做法：

1. 先將模底層包上鍚紙.

2. 消化餅乾碎加無鹽牛油溶液拌勻放入模內壓平﹐ 備用.

3. 焗爐預熱170度.

4. 用中速將忌廉芝士打至軟身﹐分數次加入砂糖繼續打勻.

5. 拂打雞蛋﹐分2次加入忌廉芝士中.

6. 無鹽牛油溶液用隔篩倒入芝士混合物﹐再用膠刮拌勻.

7. 加入淡忌廉拌勻﹐再加入雲呢拿油.

8. 將混合物倒入模內.

9. 用焗盆座水(約2-3mm高)﹐以170度入爐焗30-35分鐘.

10. 放涼後脫模﹐加入藍莓果餡再放入雪櫃數小時即成.

2008年11月20日星期四

綠魔怪

~轉貼舊文~

嗰日見到查查整抹茶蛋糕先唸起自己都有樽抹茶粉﹐唔整擺到過期又係浪費 +_+ 今次跟左佢個食譜做左呢個蛋糕﹐唔知係唔係焗得唔夠透﹐中間仲好似濕濕地咁﹐不過食落都仲有好香抹茶味。

上次見到有個食譜做大理石抹茶紅豆蛋糕﹐等我過一排又戰過先得﹐嘿嘿嘿 XDDD

2008年11月18日星期二

指定甜品 (附食譜)

~轉貼舊文~

上星期六約左同事去佢住嘅梅窩 BBQ﹐前一日我問佢要帶 d 乜野入去﹐佢地就問我… 您做『班尼士』好唔好呀？我答：好 ~ 當然冇問題啦!! 幫我唸埋就最好添呀 hahaa

星期六朝起身就拿拿聲磅材料﹐嘩 +_+" 原來都要用好多朱古力架﹐哎呀!! 見到咁肥就怕怕 >.< 撈呀撈﹐快手快腳一大盆熱辣辣『班尼士』就出爐 ^.^v

雖然冇出面做嗰 d咁靚﹐不過味道都 ok 架 XD (又自我安慰啊Q精神添)

******************************

食譜：- (日嚐甜品)

朱古力合桃班尼士 (10" x 6" 焗盆)

材料：
牛油 130g
黑朱古力粒 310g
砂糖 130g
雞蛋 150g
麵包粉 190g
麵粉 60g
朱古力可可粉 20g
梳打粉 3g
合桃碎 100g
黑朱古力碎粒 130g

預熱焗爐：
180度

做法：
1. 用熱水座溶黑朱古力粒, 然後加入牛油溶液拌勻, 備用.
2. 用電動打蛋機以中速拂打雞蛋.
3. 然後分數次加入砂糖, 繼續打勻.
4. 加入步驟 1. 的朱古力牛油溶液, 然後用膠刮拌勻.
5. 篩入所有粉類, 然後用膠刮拌勻.
6. 加入合桃碎粒, 然後拌勻.
7. 將混合物倒入焗盆內.
8. 用膠刮抹平表面, 以180度焗20分鐘.

2008年11月13日星期四

焗藍莓芝士撻 (附食譜)

~轉貼舊文~

想做呢個撻好耐﹐一直都係得個想字﹐想做嘅嘢食實在太多﹐買買埋埋一大埋﹐搞到自己都亂晒大龍 >.<"""

今次終於做左﹐而且用左好多步驟花左好多時間﹐下面呢張相只係成功左七乘﹐仲差少少就得喇…

加完藍莓醬再焗一焗﹐哈哈!! 係咪冇咁白雪雪﹐金黃左好多呢？!! 焗完放涼之後﹐加左少少防潮糖霜作點綴 Yeahhhh... 完成~

******************************

食譜：- (參考日嚐甜品)

焗藍莓芝士撻 (1.5吋 & 2吋撻模各7 個)

材料：(撻底)

麵粉 230g

牛油 130g

雞蛋 25g

砂糖 15g

材料：(芝士餡)

忌廉芝士 110g

砂糖 25g

淡忌廉 12g

雞蛋 33g

牛油 25g

雲呢拿油少許

藍莓醬 100g

預熱焗爐：

撻底 - 180度 // 芝士撻 - 150度

我的做法：

撻底：-

1. 牛油及麵粉混合, 加入砂糖及蛋用手搓成麵糰.

2. 用保鮮紙包好, 放入雪櫃30分鐘.

3. 拿出麵糰用木棍壓至3mm, 然後印出模形餅糰.

4. 把甜撻皮壓入撻模內.

5. 用叉輕力地在皮面刺上小孔.

6. 入爐焗15分鐘後放涼備用.

芝士餡：-

1. 用電動打蛋器將忌廉芝士打至軟身, 分兩次加入砂糖繼續打勻.

2. 拂打雞蛋後分2次加入忌廉芝士中, 用慢速打勻.

3. 將牛油煮滾, 用隔篩把熱牛油倒入芝士糊, 再用膠刮拌勻.

4. 加入淡忌廉拌勻, 加入雲呢拿油拌勻.

5. 將芝士糊用唧袋注入已焗至半好撻底上. (每個約9分滿)

6. 排放在淺盆裡, 並注入高 2cm 左右的熱水, 焗40分鐘.

(用較長時間低溫烘焙及隔水焗可防止芝士面出現裂紋)

7. 拿出後把水倒去, 再把藍莓醬隨意多少加上芝士餡面, 再入爐焗15分鐘.

8. 放涼後再入雪櫃雪凍.

2008年11月12日星期三

Double Caramel Pudding (附食譜)

~轉貼舊文~

好耐都未食過『Crème Brûlée』﹐上次做完真係覺得好好食﹐好香蛋味﹐而且發覺係唔可以隔夜﹐隔左晚食蛋身較硬同挺身﹐不過今次跟《我愛布丁》做左個『Double Caramel Pudding』試試… ^^

食後感覺冇『Crème brûlée』咁香蛋味﹐比較 Creamy 同多左份焦糖香~

******************************

食譜：-《我愛布丁》

雙份焦糖布丁 (125ml耐熱容器6個)

材料：(布丁糊)

牛奶 380ml

砂糖 20g

雞蛋 2隻

蛋黃 1個

材料：(焦糖醬)

砂糖 130g

水 1 大匙

熱水 2 & 1/2 大匙

預熱焗爐：

160度

我的做法：

1. 先將焦糖漿倒入容器內 (我用了現成焦糖漿)

2. 牛奶和糖先加至微熱, 再加兩茶匙的焦糖漿拌勻至完全容.

3. 蛋和蛋黃用另一個盆打散, 切勿打發起泡, 把 2. 少量地多次加入拌勻.

4. 用隔篩過濾後, 慢慢倒入已加焦糖漿的容器內.

5. 排放在淺盆裡, 並注入高 2cm 左右的熱水.

6. 放入已預熱的焗爐焗20-25分鐘.

2008年11月11日星期二

興奮

~轉貼舊文~

約左朋友去金鐘間 Great Supermarket 逛逛﹐原來好多好新鮮蔬果﹐又有成大個 Counter 都係賣 Chesse & Ham﹐剩係賣 Olive 都有幾個層架﹐花多眼亂 +_+ 好似行緊外國 d Supermarket 咁!! 仲有好多各種各樣係平時超市好少見既野﹐真係覺得自己有 d 似大鄉里出城咁 XP

我唸佢地主力係照顧外國人或者一啲對食物同生活水平有要求嘅人…

去到真係成個人都興奮都震﹐樣樣都想摸下 ^^ 如果比我一個人慢慢行兩個鐘真係少不免﹐忍唔住手喇~~ 今晚決定唔出去食﹐買嘢返屋企食…

d 三文魚子超新鮮﹐感覺一流﹐買左盒現成 Korean Sytle Chicken & Mashed Potato﹐仲有樽 Rollmops 我見到佢就怕怕 >.<"

呢個就係我地個『二人套餐』喇~~ 超開心、超好味、超滿足。我食完連碗都未執就支持唔住暈左﹐唔知係唔係飯氣功心呢 Hehe XP

2008年11月9日星期日

表哥生日 @ 雙層芒果芝士蛋糕

~轉貼舊文~

表哥生日﹐早已打算做個蛋糕比佢做﹐就當然做個有信心架啦﹐再一次揀左個『雙層芒果芝士蛋糕』。原本打算做個 6 吋﹐之後又收到 order要大 d ~ 就做左個 8 吋﹐真係有 d 驚呢﹐第一次要做個咁大﹐逢親整比人都係有 d 壓力嘛。

星期五蛋糕要上場﹐星期一就開始備料﹐唸裝飾… 星期四要上堂﹐所以星期二晚放學已經量定分量﹐準備做定朱古力片裝飾﹐星期三放工就開工﹐搞下焗下雪下裝飾下﹐都搞半夜三更 ~.~ zzzZZZ

冇辦法啦﹐鬼叫我老表好鍾意食甜品咩!! 又點可以失場呢 ^_^ 好彩﹐您都好鍾意食~ 不過人太多都唔夠分﹐冇得比您獨霸一舊添。哈哈 ~ 唔緊要啦﹐下次再整過其他比您食呀!!

想食 d 乜出聲啦﹐果日我都玩得好開心﹐難得出嚟癲﹐真係飲同玩得都唔係好夠喉﹐下個月您做搞手呀!! 約齊人就 Call 我啦!! 您知您表妹好難約架啦~ Hehehee… 整定份神秘禮物比您又點話吖 ^.^v

2008年11月6日星期四

暈陀陀

~轉貼舊文~

今晚一行四人去學做『流沙包』同『麻蓉包』﹐主力當然專注喺個『流沙包』啦 ~ 上堂不忘傾計﹐吱吱喳喳好開心 XDDD

做完型個樣好靚 ~ 顏色好 Sharp 好快趣 ~ 兩個鐘就做完呢個包…

蒸起之後試左個『流沙包』~ 嘩!! 咩嚟架』？我心目中個流沙包唔係咁架 bor

唉~ 失望 … 都好啦 ~ 起碼學到做包個卷卷係點做﹐下次可以放入其他鍾意食嘅餡… 叉燒包、雞包仔…

個師傅真係 no good ~ 人如其名﹐只係知道我唔會再嚟﹐冇下次。想同佢講今時今日咁嘅服務態度真係唔 work 架喇 (不過我決定留返啖氣暖肚) =.="

忽然更覺得 Alfred Sir 係最好添!! 哈哈~~ 興趣 ~ 都係一個享受嚟架!!

2008年11月2日星期日

麵包粉？﹗

買左包『薯仔香草麵包粉』~ 好方便﹗只要加入高粉、酵母同水就可以做成呢個包包 ~
做出嚟嘅包包好香 ~ 唯一係焗得唔夠乾身 ~ 下次可以再做好 d ~ Yeah ﹗^^

呢個就係我同好朋友嘅美點喇 ~ 細細個 ~ 又香又好可愛 ~ 下次再玩過﹗

2008年10月25日星期六

第二個 Order @ 益力多藍莓芝士蛋糕

~轉貼舊文~

早兩日接到 Order 話星期六晚要個生日蛋糕比小朋友喎﹐又開心又有壓力… 哈哈~ 今次又整咩好呢？原先打算做個士多啤梨慕思蛋糕﹐誰不知… 又有意外 +_+"

即刻翻開蛋糕書﹐睇睇屋企仲有乜嘢材料啱整…

終於揀咗呢個『益力多藍莓芝士蛋糕』﹐客人要求唔要曲奇餅底﹐所以就轉左做蛋糕底﹐其實都想做幾片朱古力做嚟襯在蛋糕邊上。但由於時間關係冇辦法﹐蛋糕邊就變得單調。

******************************

食譜：- 改編自『日嚐甜點』

益力多藍莓芝士蛋糕 Yakalt Blueberry Cheesecake

材料：（8吋 x 8吋方形慕思模)
藍莓果泥 130g
益力多 130g
原味乳酪 80g
淡忌廉 170g
忌廉芝士 195g
糖 55g
魚膠片 12.5g

做法：
1. 先打忌廉至七成軟, 備用.
2. 用另一個盆打忌廉芝士至軟身, 分數次加糖, 再加乳酪.
3. 加益力多, 用慢速再打.
4. 將已容解的藍莓果泥倒入芝士混合物, 用膠刮拌勻.
5. 然後拌入已打至七成的忌廉中.
6. 預備魚膠溶液, 加入及拌勻.
7. 倒入模內雪至凝固即成.

2008年10月20日星期一

Happy Birthday To U (Two) @ 雙層芒果芝士蛋糕

~轉貼舊文~

知道您地生日﹐冇乜特別禮物送比您地﹐為您地親手做了『雙層芒果芝士蛋糕』

屋企唔夠士多啤梨做裝飾﹐又買唔到 d 大細平均細細粒嘅﹐裝飾係我弱項… 於是乎就… 就好似小朋友咁切晒一粒粒放上蛋糕面。

雖然裝飾唔算太靚﹐但我自己唔知點解好鍾意﹐可能顏色好 Sharp﹐希望您地都會鍾意啦~

用左個 7" 份量做個 6" 蛋糕知道實有剩﹐拎定個杯出嚟留返比自己聽日食﹐hahaa…

2008年10月19日星期日

新書包 = 新書新包

~轉貼舊文~

尋日去買左兩本《開心入廚系列》嘅書

『自家製麵包』同『自家製曲奇小蛋糕』~ 之前已經買左『自家製 1 磅蛋糕』

呢幾本書我都好 Like﹐貪佢份量較少﹐可以學多 d 同過下手癮﹐急不及代做左呢個《芝士火腿包》

朋友問… 您唸住整呢個？我話係呀﹗佢話… 睇您都係貪佢個花啦…

哈哈哈 ) ) ) 咁都比您發現添 ~ ~ ~

焗嘅時候 d 芝士不停流出… 嗚 ~ 嗚 ~ 嗚 ~ 我 d 芝士呀

出爐後熱辣辣食左一個 ~ 呢隻 President Mozzarella Slice Cheese

真係好好味 ~ 可以 Encore ^^ Yeah…

2008年10月13日星期一

蕉力大理石磅蛋糕 (附食譜)

~轉貼舊文~

呢個假期我好努力﹐整完蛋糕又整包包。

呢個蛋糕都係我亂做出嚟﹐似乎又睇得下喎 XD 見平時成日都整香蕉蛋糕好似好悶咁﹐分左兩盆﹐其中一盆加入可可粉再混埋一齊… 變成左呢個『蕉力大理石磅蛋糕』^_^v Yeahhhh...

******************************

食譜：-

香蕉朱古力大理石磅蛋糕

材料：

牛油 100g
砂糖 70g
雞蛋 2隻
香蕉 1隻
低粉 100g
泡打粉 3g
無糖可可粉 10g
梳打粉 2g

預熱焗爐：180度

我的做法：
1. 香蕉用叉壓成蓉備用.
2. 牛油加糖打至羽毛狀，分次加入雞蛋打勻.
3. 加入香蕉蓉用膠刮拌勻.
4. 分次加入已篩過的低粉及泡打粉拌成香蕉麵糊.
5. 取出香蕉麵糊的三分一在另一個盆上.
6. 篩入可可粉及梳打粉拌勻.
7. 再將朱古力麵糊倒回香蕉麵糊內.
8. 輕輕拌兩下便可倒入模內焗20分鐘.

2008年10月12日星期日

為您而做…

~轉貼舊文~

呢排努力練習包包﹐好味？唔算十分但見得吓人啦 XP

上次做完個吞拿魚包﹐幸好﹗都唔算十分困難﹐只係比較需時﹐唸唸屋企有乜嘢材料就做乜嘢… 做左兩款﹐其中一款是吞拿魚包。

另一款… 包包放上腸仔、茄醬、青瓜醬及灑上碎芝士﹐出爐後… 對我嚟講~ 『睇』已經好滿足 ^_^

品嚐嘅您﹐希望您比我更鍾意﹗

2008年10月11日星期六

Screw Pasta??

~轉貼舊文~

整完意粉就整螺絲粉﹐仲有半包食剩﹐拿拿聲食埋就可以入新貨 XD

之前唸過有幾款都想整﹐最終都係做《白汁雞肉螺絲粉》﹐材料簡簡單單﹐加入自己鍾意食嘅配料… 有雞肉、薯仔同蟹柳﹐用現成嘅白汁醬又有埋菇菇﹐一餐其實可以好簡單呢~

2008年10月9日星期四

胡麻豆漿布甸

今日天朗氣清心情好好﹐想做一 d凍點。跟住餅友 S 小姐嘅食譜做左一個簡單而滑不留口嘅『胡麻豆漿布甸』。去博多屋買無糖豆漿做左四小杯﹐試左一杯後… 天啊~~ 不得了﹐超好味道呀))) 立即要 Encore 做多幾杯同朋友分享。

鍾意博多屋豆漿嘅原因係因為豆漿嘅質感好厚身﹐豆香味亦濃濃 ﹐整個口感好豐富。^^

清新口味 @ 石榴慕士蛋糕

~轉貼~

有史以來最多層 @ OPERA 法國歌劇院蛋糕

~轉貼舊文~

曾經食過文華酒店個Opera﹐感覺多層既口感好特別。Opera本身偏漏 ~ 食一小舊已經好足夠。

今次相約班餅友去學﹐因為呢個 Project 都幾繁複﹐大家都為呢個『九層嘅法國歌劇院蛋糕』馬不停蹄地努力。花左三個小時﹐仲要 d 材料已經一早磅好晒﹐有 d 又預備埋比我地﹐加埋有『Alfred Sir』同兩個得成助手『啊謙』同『Johnny』協助﹐先可以咁快完成﹐如果唔係…… 哼﹗我唸係屋企整﹐以我嘅手腳﹐六個鐘都應該未必搞得佢掂 XDDD

今次上堂提早左喺 6:30﹐收工已經拿拿去地鐵站等埋 d 餅友… 但好肚餓﹐上去之前忍唔住買左 d 魚蛋同燒賣上去食﹐呵呵 ^.^v

您地睇真 d 果九層﹐好犀利呢… 另外﹐呢樣野我都係學左甜品之後先識﹐我發現原來好多人食甜品蛋糕嗰 d 都係鍾意由面少少咁食起﹐咁當然要睇吓係咩甜品或者蛋糕﹐例如有層次嘅甜品蛋糕都應該由上至下一次過"不"落去再放入口 (原諒我表達能力好差 >.<)﹐咁先至可以食到個層次感… 試吓您地就會明。 XD

多謝您地嘅伴手禮﹐等我食後報告﹐嘻嘻。原本我都唸住整什莓瑪芬比大家﹐點知佢吐晒野咁 +_+" 又唔夠材料整﹐冇辦法啦﹐唯有下次 XP 多謝晒您地嘅參與 ~^3^

2008年10月8日星期三

包包大成功

~轉貼舊文~

我好少食包﹐我有個怪思想﹐包包食落肚會吸晒我身體入面 d 水 (平時已經少飲水﹐再吸會渣都冇 hahaa)

一直都好想學做多 d 包包﹐家裡冇 KA 唯有用手動攪拌機打﹐打到部機嬲嬲地發熱就收手用手搓…(其實用手搓都得﹐我係怕隻手臂會愈嚟愈粗啫 hehee...)

整個過程都好緊張﹐怕有閃失… 但最後您地睇吓？超開心﹐大成功呀 Yeahhh....

多謝 CaCa 分享咗個食譜之餘仲不停鼓勵我﹐我會加多好多好多把勁架喇 ^3^

黑白配 (附食譜)

Good Good Good… 尋日簡簡單單做左呢個布甸﹐話咗 Encore就 Encore啦﹐只是就係好味咁簡單囉﹐呢期牛奶唔得可以用豆漿整野食架嘛 ~

******************************
食譜參考：『SamMi』

黑胡麻豆漿布甸

材料 - 豆漿布甸(底)：
豆漿 200g
忌廉 180g
砂糖 40g
魚膠片 7g

材料 - 芝麻汁(面)：
忌廉 80g
無糖芝麻醬 25g
蜜糖 8g

我的做法：
1. 魚膠片用凍水浸軟備用.
2. 豆漿、忌廉同砂糖一起﹐蓋上微波爐保鮮紙叮熱.
3. 加入已浸軟魚膠片伴勻.
4. 放涼後雪至凝固.
5. 忌廉同芝麻醬叮熱拌勻.
6. 放涼後加入蜜糖拌勻倒上豆漿布甸面雪凍即成.

2008年10月7日星期二

沙薑雞翼

~轉貼舊文~

雞翼係非常方便的一個材料﹐從冰箱拎出黎解凍就用得﹐配上不同香料就可以有唔同口味。
以前有時間都會整下香煎 ‧ 咖喱 ‧ 老水 ‧ 蒜蓉蒸…等等。
經過見有沙薑粉 ~ 真係好耐都冇試過﹐整返十隻八隻過下口癮都好 Hehee...

2008年10月6日星期一

中西 ~ 合壁

~轉貼舊文~

平日我都鍾意整返幾味﹐煮嘢食都算係我強項﹐不過我就唔Like洗碗 >.<

煮係一種『因』﹐洗係一種『果』﹐有『因』就必有『果』XDDD 講得好啱呀 ))))

如果有人鍾意洗唔鍾意煮就係我最好嘅 Partner﹐可惜…我搵唔到… 哈哈 ~

家姐好鍾意食我煮呢個《蒜頭豆豉汁蜆肉意粉》﹐就益吓您~ 係唔係好感動呢？

2008年10月2日星期四

鳳梨卷 (附食譜)

之前做過熊仔鳳梨酥﹐結果非常一般 Poon Poon 做形有難度。又想試呢個鳳梨卷﹐好似好得意細細粒可以一口一個 ^_^

多得柏琪幫我買個唧唧咀﹐先至可以有呢個出品﹐唔該晒您呀 ^3^

睇過好多 blogger 做鳳梨卷﹐終於揀咗木日爪個食譜﹐Thank You 晒

懶人就自然用現成鳳梨餡﹐唔太甜都可以接受… 每粒約 8 - 10g﹐一包可以做到約五十粒﹐而外層皮的食譜份量亦夠包﹐我唧一條就已經包到兩粒﹐雖然都幾花時間﹐但製成品出來口碑都好好 Yeah…

總算冇白費時間而我自己都覺得整體上都唔錯﹐Good 呀

******************************

食譜參考：『木日爪』 (以下食譜及做法稍微更改)

部份參考：『Jenny Bakery』

鳳梨卷 Pineapple Roll Tart

材料 - 鳳梨餡：

現成鳳梨餡 500g (一包)

材料 - 外層皮：

牛油 125g (放軟)

糖粉 30g

低粉 180g

粟粉 40g

蛋黃 1個

蛋白適量 (搽面用)

預熱焗爐：

170度

做法：

1. 鳳梨餡搓圓﹐每粒約8-10g﹐放入雪櫃備用.

2. 先將牛油及糖粉打勻.

3. 加入低粉及粟粉分三次篩入打勻.

4. 再加入蛋黃打勻.

5. 把麵糰放入唧唧咀﹐唧出麵條.

6. 放上鳳梨餡﹐捲到包完粒鳳梨餡預留0.5cm用刀切斷.

7. 再用手輕輕按上埋口.

8. 做完所有後﹐便可以搽上蛋白.

9. 入爐焗25分鐘.

2008年9月30日星期二

香蕉焦糖雪藏乳酪磅蛋糕

~轉貼舊文~

之前見到有個餅友做呢個蛋糕好靚﹐心郁郁都想去試下﹐左磨右磨 ~ 磨左個幾月終於打算整﹐就問 CaCa 有冇呢個食譜…

收到之後… 嗰版野咁熟口熟面既 ~.~" 呵呵 XP 再打返開自己嗰本書﹐原來我都有喎 XDDD

真係對唔住呢~ 枉費您苦心一片 ^3^

唔知點解我焗完指定時間都係『震騰騰 ‧ 羅拔臣』咁喎 >.<

搞左我個幾鐘唔係要我請大口仔食嘛 =.=||| 咪又再焗過囉… 等呀等

終於出爐喇~ 開頭都驚佢中間焗唔透﹐好彩~ 革命尚算成功。切開時好開心﹐因為我第一次整呢款類似雲石紋既蛋糕。

之前 CaCa 已經提我剩係 Fold 兩下好﹐係自己多手左 d 啦~ 如果唔係可能會更加靚 XP

不過… 試完之後剩係食到香蕉味?? 食唔到有芝士同有焦糖味嘅?!!

本身係唔係咁架??!!

2008年9月28日星期日

重要… 蛋糕 @ 荔枝蘆薈慕絲蛋糕

~轉貼舊文~

我嘅 Homemade Cake﹐第一個係做比家姐… 由買焗爐到依家都只不過係半年時間就學人去賣餅。

其實只係朋友知道我鍾意整餅﹐而佢地亦有需要﹐反正都要出去買﹐又唔想咁普通﹐就不如比我賺少少外快咁喎 ^^" 所以就幫佢地做左呢個簡單而又唔易買到嘅『荔枝蘆薈慕絲蛋糕』。

呢個蛋糕唔係乜野賺錢的問題﹐而係… 唔駛花材料錢就可以過足心癮同手癮呢 XD 雖然有d 壓力﹐不過做完之後的確好滿足 ^_^

多謝您呢 Becky﹐比個機會我 ^3^