平時嘅我~ 應該會將香煎三文魚個名放喺頭
但今次主角係佢… 『松露扁意粉』
為左情節人去 Citysuper 買食材
屋企雖然有通粉、意粉、扁意粉、螺絲粉
但見到呢包有埋味嘅松露扁意粉
有 d 心郁郁想買 不過要成 HK$60 先得 250g >_< 有 d 貴啦﹗
(普通嗰 d HK$12-13 已經有包 500g 喇)
我踎左喺地吓唸左都有十分八分鐘
因為仲有其他什麼咩墨魚汁、磨菇、香草… 好幾款味咁啦
左唸右唸一輪 就下定決心就拎左呢包『松露扁意粉』
見係情人節一於豪一豪 ~ 敗吓家啦 >.<
(企返起身嗰陣仲有 d 腳痺添啊 =.=")
情人節當然唔忍心情人要捱肚餓或者係買飯盒啦
之不過情人節當晚已經唸好左据扒
咁應該買咩料煮呢個松露扁意粉好呢？
我嘅選擇困難症又衝到我頭上
剩係瓜瓜菜菜又有 d 齋
豬、牛、羊、雞、魚… 到底點好？！
不如照舊煎返三文魚啦…
有益健康又好味
再買返 d 菇菇一齊炒個意粉就 Good Fit 啦
平時真係唔會咁豪買三文魚做午餐
揀盒細件 d 都要成 HK$60 幾蚊
好肉赤吖~~~
冇眼睇 我擰轉面一手就放落手推車
我用植物牛油先煎左件三文魚備用
之後用剩餘嘅牛油炒菇菇至熟透再加埋
已烚好嘅『松露扁意粉』至熱
最後加入一大匙黑松露菌拌勻就食得喇
YEAH~~~
好彩好彩 情人大讚好味 (我即時飄飄然)
仲話呢個 Combination 好好喎
梗好啦 咁高級嘅便當 一年一次架咋
要等您慢慢回味 (偷笑中)
一年後先再有得食架喇 Wahahaa...
