白果薏米腐竹蛋糖水 (附食譜)

靚媽煮嘅『白果薏米腐竹蛋糖水』係我食過之中最最最好味 ლ(´ڡ`ლ) 每次去佢屋企我都好唔客氣話比佢知我好想食﹐佢就會整定 ("⌒∇⌒") 講左好多次話搵次早 d 去佢度學﹐一味都係得個講字… (~_~;) 早排同 Daddy 食父親節飯﹐Daddy 幫我喺樹記買左 d 腐皮碎 + 扁竹放在喺冰箱﹐唸住去完日本返嚟就整﹐所以上次去靚媽屋企就問定佢點整 ヽ(●´∀｀●)ﾉ

靚媽話唔好懶﹐白果要買原粒自己去殼去皮﹐而靚媽煮腐竹蛋糖水係用『竹絲雞雞蛋』﹐我都係喺佢度先第一次食﹐Size 比雞蛋細 d ﹐蛋味都好香~ 不過唔記得有咩益處﹐哈哈﹗啱咁又比我喺街市見到就買左五隻 (好貴﹐都要成兩蚊隻 >.<)

其實煮呢個糖水都好快﹐亦冇咩難度﹐只係去白果殼同皮要花 d 時間﹐記得白果要去埋芯﹐唔係食白果嗰陣就會苦… 我就係唔記得左 ~(>_<。) 煲完先隔返 d 白果出嚟去芯 (¬_¬) 超豬兜﹗

煲左一大煲﹐超香濃豆味 ლ(´ڡ`ლ) 同 Citysuper 間博多屋 d 豆漿一樣咁正 (我最愛嘅豆漿)。煮呢個糖水重點係 "凍水落腐竹" ﹐之後就落白果同薏米煲半個鐘左右﹐煲到 d 腐竹溶晒就可以﹐用分蛋法將兩至三隻雞蛋分開打﹐熄火落蛋漿做成金銀蛋花效果﹐如果鍾意嘅~ 可以落 d 西米焗幾個字 (唔駛開火滾)﹐而竹絲雞雞蛋就烚好加入就可以 ╰(*´︶`*)╯♡

咁啱去朋友屋企 Gathering﹐嘿嘿﹗拎左一樽過去… 可以同您鍾意嘅人分享係最甜最開心嘅事﹐雖然朋友唔鍾意食薏米﹐但都好比面食左一碗半 (´ε｀ )♡ Sweet sweet 哇哈哈~~ Yeah yeahh... ☆*:.｡. o(≧▽≦)o .｡.:*☆