尋日唔記得喺邊﹐無意見到『栗子炆雞』呢樣野﹐呢個… 我真係未整過喎﹗今日就上去啊蘇 (蘇施黃) 個飲食網睇吓有冇食譜可以偷吓師 ╰(*´︶`*)╯♡ 咁啱同小玉傾電話時佢講『栗子炆雞』﹐我就問咩咩『栗子炆雞』呀？原來佢見到某雜誌介紹梁堯祖教整『栗子炆雞』﹐呵呵呵﹗又會咁啱嘅﹐我今日都搵緊呢個食譜﹐佢就拎去 Scan & Send 左呢個食譜比我﹗Yeahhh~~ (´ε｀ )♡ 小玉啜啜先 ~
睇晒兩個食譜﹐綜合左 d 煮法同意見﹐收工就去買材料囉 ┗(＾0＾)┓ ┏(＾0＾)┛好鬼衰﹐呢排真係零舍有衝勁架啫 Hehehee... 部份菜檔都有栗子買﹐菜檔姐姐教﹐返嚟煲 d 水﹐水滾倒晒落去滾兩三分鐘﹐d 皮就好易去﹐如果太熱就用條毛巾包住粒栗子擦拭 d 皮就會易 d 甩。哈哈﹗(★^o^★) 真係得﹐好易咋﹗
不過如果您鍾意食栗子就買多少少﹐因為要預有 d 栗子係壞 (包住層衣睇唔到架)。我有 d 擔心栗子唔夠腍﹐所以去完衣之後切左一半再烚左陣﹐烚完偷食試吓腍唔腍﹐嗯嗯﹗腍喇 ~ 好味 ლ(´ڡ`ლ) 偷食… 再偷食… ლ(´ڡ`ლ) (所以要買多少少囉) Hahahaaa.... (≧▽≦)
原來都唔係比想像中咁難整﹐切吓炒吓炆吓… 就有成品喇﹗希望您鍾意啦 ╰(*´︶`*)╯♡
******************************
食譜：- (可以隨自己喜愛調較份量)
材料：
雞翼 - 10隻
栗子 - 10粒
紅蔥頭 - 3粒
薑 - 2片
蔥 - 適量 (我要大量﹐哈哈﹗)
水 - 1碗
雞翼醃料：
生抽、老抽、蠔油、糖、胡椒粉醃二十分鐘﹐再落生粉﹐再落麻油或生油
汁料：
生抽、蠔油、糖
我的做法：
1. 雞翼啤水後﹐ 用抹手紙印乾﹐加入醃料拌勻備用.
2. 煲水﹐ 水滾後放入栗子兩至三分鐘﹐取出放在毛巾上擦拭去皮﹐ 可原粒或切半﹐ 放入滾水烚多十分鐘﹐取出略沖洗備用.
3. 紅蔥頭去皮切碎﹐ 薑切兩片﹐ 蔥切段 (分開蔥白).
4. 開鑊加油至熱﹐ 大火爆香紅蔥頭、薑片、蔥白﹐再落雞翼炒至微焦 (炆起先夠香口).
5. 加栗子炒勻﹐ 再加入汁料同一碗水, 滾後收細火﹐ 加蓋炆20分鐘.
6. 最後加入蔥段點略炒即成.
**醃料同汁料我冇特定份量﹐ 都係靠經驗同感覺**
**『醃』呢一個部驟嘅先後次序都好重要﹐ 其實所有肉類都應該先落調味料﹐ 再落生粉﹐ 最後先落生油。
~ 即係… 先落生抽、老抽、蠔油、糖、胡椒粉等等呢 d 有味嘅調味料先﹐等十五分鐘左右﹐等到 d 味入左 d 肉入面。
~ 先再落生粉拌勻﹐ 咁就會包左喺肉嘅出面﹐ 令肉質柔軟一點﹐ 亦都可以令調味汁料輕輕掛在肉上。
~ 最後先落生油拌勻﹐ 包住最外層保護住所有調味料﹐ 望落去都會有 d 光澤。
~ 如果早早就落左生油包住左件肉﹐ 咁其他調味料可能要較長時間先入到味架喇。
